خون کا قطرہ نہیں ہے چشم گریاں اب تلک

خون کا قطرہ نہیں ہے چشم گریاں اب تلک

عضو سارے جل گئے پر دل ہے بریاں اب تلک

سو زباں ہو مثل شانہ معذرت کی مو بہ مو

صاف دل ہوتی نہیں وہ زلف پیچاں اب تلک

کہیو اے قاصد پیام اس کو کہ تیرے ہجر سے

جاں بہ لب پہنچا نہیں آتا ہے تو یاں اب تلک

سن کے نا خوش ہو کہا نسبت تھی مجھ سے عشق کی

سو یہ اب معلوم ہوئی تس پر ہے نازاں اب تلک

عشقؔ کا دعویٰ کیا اور ہجر میں جیتا رہا

پھیر تو شاکی ہے ہم سے کہیو ناداں اب تلک