کیا جو مجھ طرف گل رو نظر آہستہ آہستہ

کیا جو مجھ طرف گل رو نظر آہستہ آہستہ

او پہنچی بلبل دل کوں خبر آہستہ آہستہ

ہوئے جو اشک غم جاری سراپا چشم پر خوں سیں

لگے بہنے کوں عالم میں نہر آہستہ آہستہ

جو دیکھا تجھ ہلال ابرو و مثل بدر تاباں رخ

خجالت سوں لگا گلنے قمر آہستہ آہستہ

سراپا جرعہ نوشان حقیقت میں تأثر ہے

کرے جیوں بادۂ گل رنگ اثر آہستہ آہستہ

جو کچھ تخم عمل بوتا ہے اے دل باغ امکاں میں

شجر ہو لائے گا آخر ثمر آہستہ آہستہ

سٹا ہے عشق کی لا کر او میرے دل میں چنگاری

اٹھیں گے شعلہ افشاں ہو شرر آہستہ آہستہ

ہوا تجھ شعر یوں روشن ترابؔ اعظم الشعرا

کہ جیوں شب جا کے ہوتا ہے سحر آہستہ آہستہ