شیخ اگر تو نے نظر جگ سے اٹھائی ہوتی

شیخ اگر تو نے نظر جگ سے اٹھائی ہوتی

کب عبادت تری ناقص او ریائی ہوتی

ٹھیک اس وقت تری راہ نمائی ہوتی

یار کے گھر کی مجھے راہ بتائی ہوتی

جس کے باعث نہ کبھی یار سے ہوتی غفلت

ناصحا مجھ کو وہ تدبیر سکھائی ہوتی

یارو واصل بہ حق اس طرح نہ ہوتا عاشق

اس بچارے کو اگر تاب جدائی ہوتی

جل کے پروانہ ہوا خاک ہوا جی اٹھتا

گور پر اس کے جو پھر شمع جلائی ہوتی

شہر کیا چھوڑ کے بیٹھا ہے تو جنگل میں ترابؔ

پہلے ہستی کی دکاں اپنی لٹائی ہوتی