اندر کا حال جو بھی ہو محراب سامنے

اندر کا حال جو بھی ہو محراب سامنے

تاریکیوں میں غرق وہ مہتاب سامنے

سولی پہ چڑھ گیا میں ہی عظیم تھا

کچھ بھی تو ہوتے جرم کے اسباب سامنے

اب کیا ہے میری دھوم ہے لیکن کسے خبر

کس راستے سے آئے ہیں القاب سامنے

پھر آ رہا ہے یاد وہ منظر کہ ایک بار

دشمن کے ساتھ آئے تھے احباب سامنے

نا کامئی حیات کا ہر عکس روبرو

تعبیر ڈھونڈھتا ہوں تو ہر خواب سامنے

وہ بھیڑ سے گزر گئے فن سے تھے آشنا

ہم پھنس گئے کہ مل گئے احباب سامنے