کیا بھروسہ یہاں زندگانی کا ہے

کیا بھروسہ یہاں زندگانی کا ہے

انتظار آپ کی مہربانی کا ہے

درد غربت میں ہم مبتلا ہیں تو کیا

حوصلہ آج بھی میزبانی کا ہے

تجھ کو چاہا کروں تجھ پہ قرباں رہوں

اس سے بڑھ کر جنوں کیا جوانی کا ہے

بھینی بھینی ہوا خوشبوؤں کی فضا

آج موقع تری مہربانی کا ہے

تاج سر پر نہیں رہ گیا ہے تو کیا

نام اب بھی مری حکمرانی کا ہے

اس کے تاریک پہلو پہ چپ ہے زباں

یوں تو چرچا بہت خوش بیانی کا ہے

ایک تو ہی نہیں ان پہ گوہرؔ فدا

دور تک سلسلہ وصف خوانی کا ہے