مے خانہ میں عجیب تماشا نظر پڑا

مے خانہ میں عجیب تماشا نظر پڑا

کوئی ادھر پڑا ہے تو کوئی ادھر پڑا

میں نے اٹھا لیا اسے اپنا سمجھ کے دل

شیشہ بھی کوئی راہ میں پایا اگر پڑا

آیا کرو ہمارے بھی گھر پر کبھی کبھی

فرماؤ تو سہی تمہیں کس کا ہے ڈر پڑا

کیا جانے کیا ہوا مرے خط کے جواب کو

کیا جانے کس بلا میں مرا نامہ بر پڑا

اٹھنے کی بھی تو ضعف سے طاقت نہیں رہی

چلمن کی طرح ہوں میں در یار پر پڑا

اے چرخ بے کسوں کو ستانا نہیں ہے خوب

مٹ جائے گا تو صبر ہمارا اگر پڑا

ساری نگاہ شوق کی حسرت نکل گئی

تھا شب کو خواب نازنیں وہ بے خبر پڑا