کوئی طلسم خواب تھا یہ بعد میں کھلا

کوئی طلسم خواب تھا یہ بعد میں کھلا

وہ شخص اک سراب تھا یہ بعد میں کھلا

خوش تو بہت تھے ساتھ سمندر کا پاکے لوگ

جو کچھ تھا زیر آب تھا یہ بعد میں کھلا

تا عمر جس کتاب میں الجھے رہے تھے ہم

وہ عشق کا نصاب تھا یہ بعد میں کھلا

وہ کم سخن تو اوروں پہ کہتا رہا بہت

ہم سے ہی اجتناب تھا یہ بعد میں کھلا

ہم جس کی خاک چھان کے آئے تھے در بہ در

وہ یوں ہی دستیاب تھا یہ بعد میں کھلا

ہم جس کو سائبان سمجھتے تھے مستقل

سر پر کوئی سحاب تھا یہ بعد میں کھلا

اطہرؔ کی صاف گوئی یہ مشکوک تھے سبھی

وہ تو کھلی کتاب تھا یہ بعد میں کھلا