سدا بہ صورت صحرا نہیں رہوں گا میں

سدا بہ صورت صحرا نہیں رہوں گا میں

تمام عمر تو پیاسا نہیں رہوں گا میں

میں اپنے آپ کا ہونے سے یوں بھی ڈرتا ہوں

کہ اس کے بعد کسی کا نہیں رہوں گا میں

بچھڑتے وقت دلاسہ مجھے وہ کیا دیتا

وہ جانتا تھا کہ زندہ نہیں رہوں گا میں

تو اب کی بار ملے گا تو خود ہی دیکھے گا

ترے گمان کے جیسا نہیں رہوں گا میں

میں اپنی ذات میں ہو جاؤں گر ستارہ بھی

کسی چراغ کو خطرہ نہیں رہوں گا میں

زمانہ یوں ہی کرے گا جو رائیگاں اطہرؔ

کسی کہانی کا حصہ نہیں رہوں گا میں