شریعت پہ ہو جس کو خوب استقامت

شریعت پہ ہو جس کو خوب استقامت

وہ کیوں کر نہ ہو اہل کشف و کرامت

ضرورت ہے علم اہل ارشاد و حق کو

کہ جاہل کی نا معتبر ہے امامت

قیامت کے عرصے کا عرصہ نہیں کچھ

موئے جس گھڑی دو ہی دن ہے قیامت

سلامت روی کا ہو جس کا طریقہ

ہے اس وقت میں وہ ہی اہل ملامت

یہی دونوں کام آتے ہیں عاقبت میں

رہیں دین و ایمان اپنے سلامت

نشاں پر لگے اس کا تیر دعا کب

نہ چلہ کشی سے جھکے جس کا قامت

ترابؔ انتقام عمل ہے مسلم

جہاں میں بلا ہے گناہوں کی شامت