پھر وہ نظر ہے لطفِ فراواں لئے ہوئے

پھر وہ نظر ہے لطفِ فراواں لئے ہوئے

پھر ساحرہ ہے سحر کا ساماں لئے ہوئے

آزادیوں کی خیر کہ صیاد پھر اٹھا

کاندھوں پہ دام زلفِ پریشاں لئے ہوئے

جوشِ جنوں کو مژدہ کہ پھر کوئی آ گیا

رنگِ بہار وبوئے گلستاں لئے ہوئے

پھر آئے ہیں عیادتِ زخم جگر کو وہ

چٹکی میں اندمال کا ساماں لئے ہوئے

مضطر ہے آنکھ پھر کسی دامن کے واسطے

آغوش میں تلاطم طوفاں لئے ہوئے

پھر مانگتا ہے رحم کسی بے وفا سے دل

انجامِ آرزو سرمژگاں لئے ہوئے

چشمِ امیدوار انہیں دیکھتی ہے پھر

اک اک نظر میں سیکڑوں ارماں لئے ہوئے

بیگانہ وار بیٹھے ہیں اس انجمن میں ہم

اک آرزوئے پرسش پنہاں لئے ہوئے