ابھی تو درد سے اس دل کا رابطہ ہے وہی

ابھی تو درد سے اس دل کا رابطہ ہے وہی

ہماری راہ میں کانٹوں کا سلسلہ ہے وہی

یہ آنکھ خواب ستاروں کے دیکھتی تھی مگر

مرے نصیب میں جو تھا مجھے ملا ہے وہی

چھڑا کے ہاتھ غم زندگی سے جاؤں کہاں

فلک وہی ہے زمیں کا بھی دائرہ ہے وہی

وہی کھلی ہوئیں آنکھیں ہیں چاند سورج کی

تری تلاش میں جاتی ہوئی ہوا ہے وہی

بھروسہ سوزؔ طلوع سحر کا ہے ورنہ

اندھیری رات ہے ظلمت کا سامنا ہے وہی