زبس کوئے ملامت میں ہوں خوگر بادہ نوشی کا

زبس کوئے ملامت میں ہوں خوگر بادہ نوشی کا

گریباں چاک ہے ہاتھوں سے میرے پردہ پوشی کا

مری فریاد پر بھی اب گمان شور مستی ہے

بھرا افسانہ ہو کر کان میں نے حق نیوشی کا

نہ ہو بدنام مے ڈرتے ہیں ورنہ ہم سے رندوں کا

جواب پندِ ناصح میں سبب کیا تھا خموشی کا

چراغ دیر و کعبہ میں کرے کب فرق پروانہ

دل عاشق ہے بندہ یار کی جلوہ فروشی کا

بٹھا ئے گی مجھے گوشے میں یہ افسردگی آخر

دم احباب سے اب سرد ہے دل گر مجوشی کا

میاں مٹھو نہ بننا اپنے منہ سے دیکھنا صاحب

نہ لانا رنگ صوفیؔ کر کے دعویٰ سبز پوشی کا