حوصلہ رکھ کہ یہ دنیا نہیں ساری دنیا

حوصلہ رکھ کہ یہ دنیا نہیں ساری دنیا

ایک نقشہ ہے یہ کاغذ پہ اتاری دنیا

رنگ کمزور بہت تھے جو ہوس نے ڈالے

مجھ سے جس طور سنور پائی سنواری دنیا

میں نے کشکول اٹھایا نہ میں دیوانہ بنا

ہوس کی کب میرے اعصاب پہ طاری دنیا

ایک درویش نے پوچھا تھا بڑی شفقت سے

کون سی میری ہے اور کون تمہاری دنیا

جانتا ہوں کہ یہ بس میں نہیں آتی اکثر

گھات میں رہتی ہے ہر آن شکاری دنیا

اب اسے کون سے کونے میں سجائیں آزادؔ

میرے کمزور سے آنگن میں یہ بھاری دنیا