صدمے اٹھانے ہوں جو امید وصال کے

صدمے اٹھانے ہوں جو امید وصال کے

قلب وجگر کو پھینک دے پہلے نکال کے

کیا گہرے گہرے گھاؤ ہیں رنج وملال کے

آؤ تمہیں دکھائیں کلیجہ نکال کے

دعوے جو بخیہ گر نے کئے اندمال کے

ہر زخم دیکھنے لگا آنکھیں نکال کے

چھالے نہ ٹوٹ جائیں دل پر ملال کے

یارو ہمیں لحد میں لٹانا سنبھال کے

اے درد توہی اٹھ کہ لگے کچھ سراغ دل

آخر کدھر گیا ہمیں آفت میں ڈال کے

تیری نگہ پلٹ نہ پڑے اپنی ہی طرف

او آئینہ میں دیکھنے والے جمال کے

اب تو اثر سے دور ہو اے داستانِ غم

آنسو نکل پڑے مرے پرسان حال کے

اے بیکسی خدا کے لیے تو نہ جائیو

احباب تو چلے گئے تربت میں ڈال کے

کیوں کر ہر ایک داغ نہ ہو آفتاب حشر

دل میں ہمارے لاکھوں ہیں محشر خیال کے

مانند برق تیغ نگہ کوند نے لگی

پڑھئے جناب قیس مگر دل سنبھال کے