اٹھا بھی نہیں جلوہ گہ ناز کا پردہ

اٹھا بھی نہیں جلوہ گہ ناز کا پردہ

یاں کھل گیا موسیٰ سے نظر باز کا پردہ

معراج میں ہے ناز نہ انداز کا پردہ

ہلکا سا ہے رنگینیٔ آواز کا پردہ

جز عاشق ومعشوق کوئی اور نہیں تھا

اٹھا نہ مگر جلوہ گہ ناز کا پردہ

او پردہ نشیں حد ہوئی ایجاد وحیا کی

ہے لہجہ عاشق تری آواز کا پردہ

بسمل ہوا میں تم نے سوئے غیر جو دیکھا

تو رہ گیا تیرِ نگہ ناز کا پردہ

اٹھ جاؤں کسی طرح تو جلوہ نظر آئے

میں خود ہوں تری انجمن ناز کا پردہ