اک طلسم حسن قدرت چشم جانانہ بھی ہے

اک طلسم حسن قدرت چشم جانانہ بھی ہے

مئے بھی ہے میکش بھی ہے ساقی بھی پیمانہ بھی ہے

نور قدرت بھی ہے ان آنکھوں میں تصویریں بھی ہیں

غور سے دیکھو تو کعبہ بھی ہے بت خانہ بھی ہے

اہل دل سے پوچھ لو کیفیت چشم حسیں

زہرکا ساغر بھی ہے امرت کا پیمانہ بھی ہے

روک دیتی ہے نگاہِ ناز وحشت کے قدم

بس اسی زنجیر سے مجبور دیوانہ بھی ہے

چشم افسوں ساز میں سب کچھ ہے اور کچھ بھی نہیں

جس طرح دنیا حقیقت بھی ہے افسانہ بھی ہے

دل کی دنیا ہی نہیں ہے زیر فرمان نظر

رجعت خورشید کا مشہور افسانہ بھی ہے

مئے پرستو بزم میں ہشیار رہنا دیکھنا

قیس ؔکہتے ہیں جسے شاید وہ دیوانہ بھی ہے