معبود ہمارا بت دل خواہ یہی ہے

معبود ہمارا بت دل خواہ یہی ہے

اللہ جسے کہتے ہیں واللہ یہی ہے

اے سالک دیں دل سے تو اپنے نہ ہو غافل

اس کعبۂ وحدت کی میاں راہ یہی ہے

از بس کہ جہاں میں ہے عیاں نور الہی

دیکھوں ہوں جسے کہتا ہوں اللہ یہی ہے

یہ قالب خاکی ہے عجب مظہر نیرنگ

بندہ یہی نوکر یہی اور شاہ یہی ہے

جب دیکھوں ہوں اس کو میں بتوں میں یہ کہوں ہوں

جس نے کہ میرے دل کو لیا آہ یہی ہے

اے شیخ تو اصغرؔ کا عبث پوچھے ہے مذہب

ہادی یہی مہدی یہی گمراہ یہی ہے