حکایت ستم بے شمار ہونے دو

حکایت ستم بے شمار ہونے دو

بسر کسی کی شب انتظار ہونے دو

نظر تو کثرت جلوہ سے ہو گئی خیرہ

دل وجگر کو بھی کچھ زخم دار ہونے دو

سرِ نیاز نہ ٹھکراؤ اپنے در سے مرا

ذرا اسے بھی تو سجدہ گزار ہونے دو

جمال غنچہ وگل جلوۂ مہ وانجم

تم اپنے عارض ورخ پر نثار ہونے دو

اڑا کے خاک نشیمن مسل کے پھولوں کو

چمن کو روکش فصل بہار ہونے دو

مری زباں سے مرا حال جب نہیں سنتے

تو پھر نظر ہی کو افسانہ بار ہونے دو

بیاد گیسوئے خم دار اپنا دل ثروتؔ

ادا شناسِ غم روزگار ہونے دو