آیا نہیں وہ انجمن آرا کئی دن سے

آیا نہیں وہ انجمن آرا کئی دن سے

محروم ہے یہ چشم تماشا کئی دن سے

دیکھا نہیں وہ رشک مسیحا کئی دن سے

بے کیف نظر آتا ہے جینا کئی دن سے

گھبرائی ہوئی پھرتی ہیں ہر سمت نگاہیں

دیکھا نہیں وہ حاصل دنیا کئی دن سے

کیوں بیٹھے بٹھائے مرا دل بیٹھ رہا ہے

تاریک نظر آتی ہے دنیا کئی دن سے

خالی نظر آنے لگا آغوش تصور

ہے پیش نظر حشر کا نقشہ کئی دن سے

اس کو شب فرقت کہیں یا عکسِ قیامت

دیکھا نہیں جس شب کا سویرا کئی دن سے

مشتاق ہیں ثروتؔ ہمہ تن دیر نگاہیں

دیکھی نہیں وہ نرگس شہلا کئی دن سے