یہ زندگی بھی عجب مشغلہ لگے ہے مجھے

یہ زندگی بھی عجب مشغلہ لگے ہے مجھے

امید و بیم کا اک سلسلہ لگے ہے مجھے

ستم میں اس کے کرم کا مزا لگے ہے مجھے

جفا کرے ہے وہ جتنی وفا لگے ہے مجھے

عطا کیا ہے محبت نے درد کا یہ مزاج

کسی کا جرم ہو اپنی خطا لگے ہے مجھے

گلی گلی میں جو چرچا اسی کی ہوتی ہے

یہ درد عشق برا سانحہ لگے ہے مجھے

نظر کا میری کرشمہ ہے اور کیا کہئے

کہ جس کو دیکھیے وہ آپ سا لگے ہے مجھے

نشان منزل محبوب کیا ملے مجھ کو

جو راہزن ہے وہی رہنما لگے ہے مجھے