یہ ہماری میکشی کا مختصر افسانہ تھا

یہ ہماری میکشی کا مختصر افسانہ تھا

آنکھ ساقی سے لڑی تھی ہاتھ میں پیمانہ تھا

گوشے گوشے کو مرے دل نے منور کر دیا

داغ دل کہتے تھے جس کو اک چراغ خانہ تھا

عمر بھر اس کا تصور خانۂ دل میں رہا

جس کو کعبہ ہم نے سمجھا تھا وہ اک بت خانہ تھا

پاس دولت تھی تو بیگانے یگانے جمع تھے

جب گئی دولت یگانہ تھا نہ وہ بیگانہ تھا

تو اگر دیتی سہارا دور ہوتیں کلفتیں

کام اتنا سا ترا اے ہمت مردانہ تھا

دل کے جانے کا تمہیں کیوں باغؔ ہے رنج و ملال

جانے دو کمبخت کو مجنوں سا تھا دیوانہ تھا