اشک آنکھوں میں فغاں ہونٹوں پہ حسرت دل میں ہے

اشک آنکھوں میں فغاں ہونٹوں پہ حسرت دل میں ہے

اک نئی صورت سے ظاہر عشق ہر منزل میں ہے

کس طرح مجھ کو نگاہ لطف کا ہو اعتبار

اس کو بھی میں جانتا ہوں جو تمہارے دل میں ہے

اتحاد شوق پیدا کر رہا ہے رسم و راہ

ہے وہی ان کی نگاہوں میں جو میرے دل میں ہے

بس کہ وعدہ اس کا ہے مشروط رنج انتظار

ایک گرداب بلا بھی دامن ساحل میں ہے

مجھ کو بیدل کیوں نہیں کرتیں مری محرومیاں

کیا فریب مدعا بھی سعی لا حاصل میں ہے

پھر بہانہ اس کے تیر ناز کو مل جائے گا

پھر نہ کہہ دینا کہیں ہادیؔ محبت دل میں ہے