عشق کا سودا تھا سر میں لب مگر خوش تھے

عشق کا سودا تھا سر میں لب مگر خوش تھے

ہم وفور بے خودی میں بھی سراپا ہوش تھے

کچھ نہ کچھ تسکین ہوتی تھی دلِ مہجور کی

اشک ناکافی شبِ غم زینت آغوش تھے

شمع جس صورت سے ان کی بزم میں جلتی رہی

دل ہمارا جل رہاتھا اور ہم خاموش تھے

یہ مری قسمت کہ جب تک آشیاں جلتا رہا

چپ تھی سوسن کی زباں اہل چمن خاموش تھے

ہم نے اے قدسیؔ کبھی لب تک فغاں آنے نہ دی

شامِ غم خاموش تھے صبحِ الم خاموش تھے