چھپ کے کہتا ہے انالحق کوئی میخانے میں

چھپ کے کہتا ہے انالحق کوئی میخانے میں

روح منصور ہے بوتل میں کہ پیمانے میں

کس نے چھڑکا ہے لہو دل کا صنم خانے میں

سرخیاں خون کی ہیں حسن کے افسانے میں

خواب تخلیق جنوں خاک میں ملنا تعبیر

کھینچ لائی مری مٹی مجھے ویرانے میں

دل مردہ سے محبت نے مسیحائی کی

پھونک دی روح جنوں کی ترے دیوانے میں

مجھ سے پوچھے نہ حرم وجہ سجود بے قید

راز کی بات کہا کرتا ہوں میخانے میں

بے نیازی کی ادا بے خبری کی عادت

پینے والوں میں ہے یا آپ کے دیوانے میں

شاد آباد رہیں دل کے جلانے والے

بھر دیا درد مری زیست کے افسانے میں

شعلہ طور ہے اس آڑ میں یا شمع کی آگ

نہیں پروانہ کوئی اور ہے پروانے میں

نہیں اے شیخ کم وبیش ثواب اور گناہ

توبہ کرلیتا ہوں ہر گھونٹ پہ میخانے میں

داستان ازل وخلق ہے مجھ سے مشہور

میرا قصہ مری تصویر ہر افسانے میں

اختیار ہوس بادہ تولاؔ معلوم

جبر ہی جبر ہے تخلیق کے میخانے میں