تمہیں کو شوق نہیں کچھ مجھے ستانے کا

تمہیں کو شوق نہیں کچھ مجھے ستانے کا

ملا ہے دل تو یہی رنگ ہے زمانے کا

تمہارے حسن کا شہرا مرے فسانے سے

تمہارے حسن سے شہرا مرے فسانے کا

غرض کہ اب کسی عنواں نہیں مجھے راحت

سکوں ہے نام مرے دل کے بیٹھ جانے کا

ہمیں تو کوئی حسینوں میں با وفا نہ ملا

تمہارا ذکر نہیں ذکر ہے زمانے کا

مجھے بھی اب تو تردد ہے عذر وحشت میں

نگاہ مہر نے خوں کر دیا بہانے کا

وہ لاش میکشؔ ناکام نوجواں کی ملی

ستم ہے اف یہ نتیجہ ہے دل لگانے کا