پرتو رخ سے منور گوشوارا ہوگیا

پرتو رخ سے منور گوشوارا ہوگیا

جلوہ گر خورشید کے پہلو میں تارا ہوگیا

ہر لبِ جاں بخش ہے سر چشمۂ آب حیات

خال مشکیں خضر کی آنکھوں کا تارا ہوگیا

جب چڑھی تیوری تری اترا مرا منہ خون سے

دل تہہ و بالا ہوا حشر آشکارا ہوگیا

اڑ چلا دیکھا نگاہ گرم سے جب یار نے

بے قراری سے دل بے تاب پارا ہوگیا

صاف قلعی کھل گئی اس شعلہ رو کے سامنے

آئینہ ایسا جلا کافور پارا ہوگیا

حشر کرتا ہے یہ کہنا آپ کا بالائے بام

لو سوا نیزے پہ سورج آشکارا ہوگیا

لو لگی ہے اب تو اس کان صباحت سے سحرؔ

زہرہ جس کے کان کا ہر گوشوارہ ہوگیا