وہی رفتار ہو جانا وہی گفتار ہو جانا

وہی رفتار ہو جانا وہی گفتار ہو جانا

کمال عشق ہے تمثال حسن یار ہو جانا

مرا شیوہ ہے اپنی آرزو میں دیکھ کر ان کو

ہر اک جلوے پہ ممنون دل بیمار ہو جانا

خیال آیا کہ دل سینے کے اندر ہو گیا بسمل

یہ کس نے حسن کو سکھلا دیا تلوار ہو جانا

اڑا دے گا تمامی پردہ ہائے راز کے ٹکڑے

غضب ہے مے کش اسرار کا ہشیار ہو جانا

سکون آنے لگا ہے پھر مری دنیائے مضطر میں

ذرا بیتاب کن پھر اے غم دیدار ہو جانا

نشورؔ واحدی کی طبع رنگیں اے معاذ اللہ

زمانہ چھوڑ کر آوارۂ گلزار ہو جانا