جب کبھی عشق کا سامان نظر آتا ہے

جب کبھی عشق کا سامان نظر آتا ہے

خانۂ دل میں کوئی آگ لگا جاتا ہے

میں نے مانا کہ برے وقت کا مارا ہوں میں

دل پُر غم کو تری یاد سے چین آتا ہے

آب حیواں کا اثر خضر اٹھا کر رکھیں

جینا کیا ہے ہمیں مرنے میں مزا آتا ہے

تیرے ہونٹوں پہ فدا تیرے تبسم پہ نثار

مسکرانے سے ترے چاند بھی شرماتا ہے

واعظا قرب خدا سخت کٹھن ہے منزل

یہ عطیہ ہے جو قسمت ہی سے مل پاتا ہے

پسِ پردہ ہے کوئی قوت مقناطیسی

عشق بے ساختہ چلمن سے ملا جاتا ہے

ہم بھی اک آس لگائے ہوئے بیٹھے ہیں وجیہؔ

اسی امید میں جینے کا مزہ آتا ہے