نظر بے نور ہے دل بے زباں ہے

نظر بے نور ہے دل بے زباں ہے

اجالا ظلمت شب میں نہاں ہے

یہ کیسی آزمائش ہے خدایا

مرے دل کا یہ کیسا امتحاں ہے

نہ جانے کس گھڑی اٹھے وہ طوفاں

جو میرے چشم و دل کے درمیاں ہے

ڈرا اے گردش دوراں نہ مجھ کو

کہ میرا حوصلہ اب بھی جواں ہے

مسلسل بڑھ رہی ہے بے قراری

تو اے وجہ سکون دل کہاں ہے

مرے حالات کیا پوچھو ہو مجھ سے

مرے چہرے سے سب کچھ تو عیاں ہے

کروں توصیف اس کی کیسے دائمؔ

وہ اپنے آپ میں اک آسماں ہے