اس کی یادوں کو بھلا دل سے بھلائیں کیسے

اس کی یادوں کو بھلا دل سے بھلائیں کیسے

آگ جب دل میں لگی ہو تو بجھائیں کیسے

دل کے آئینے میں تصویر بسی ہے ان کی

نقش کچھ ایسے جمے ہیں کہ مٹائیں کیسے

یوں تو ظاہر کہ بہت غم ہیں ہمیں دنیا کے

داغ سینے میں جو پنہاں ہیں دکھائیں کیسے

آشیاں کیسے بنے بکھرے ہوئے تنکوں کا

دل جو ٹوٹا ہوا گھر ہو تو بسائیں کیسے

ان کے آنے کی خبر سنتے ہیں اک مدت سے

ہاں بغیر ان کے مگر بزم سجائیں کیسے

دل کے آئینے میں ہے اس کا تصور دائمؔ

روٹھ کے بیٹھا ہو جو اس کو منائیں کیسے