یا رب اس گل سے سدا دست خزاں دور رہے

یا رب اس گل سے سدا دست خزاں دور رہے

رنگ و بوئے چمن حسن بدستور رہے

زخم دل تازہ ہے اور دست جنوں ہے چالاک

کس طرح اس میں لگا مرہم کافور رہے

درد کش میں بھی ہوں ایک جام ملے پیر مغاں

فیض سے تیرے سدا مے کدہ معمور رہے

محتسب حیف ہے اس سنگ دلی پر تیری

کب تلک شیشۂ مے جام و سبو چور رہے

ساقیا تیری یہ مجلس رہے آباد سدا

کوئی سرشار رہے اور کوئی مخمور رہے

کس قدر رات رہا درد جگر کلفت غم

چاندنی رات تھی پر سیر سے مجبور رہے

داغ دل شمع نمط سینہ میں روشن ہی رہے

قبر بھی میری اسی داغ سے پر نور رہے

خاک میں بھی نہ ملا چین تیرے دل کو وصیؔ

بے‌ قرارانہ جو تم تا بلب گور رہے