زباں سے میری کیا نکلا تم ایسے سر گراں کیوں ہو

زباں سے میری کیا نکلا تم ایسے سر گراں کیوں ہو

خموشی جب بیاں ہو شکوۂ طرز بیاں کیوں ہو

تمہارے حسن کا قصہ ہو یا میری محبت کا

جسے دل میں چھپائیں ہم وہ زیب داستاں کیوں ہو

تری آمادگی قاتل تبسم ہے محبت کا

توجہ گر نہیں مضمر تو قصد امتحاں کیوں ہو

اگر مٹنا مسلم ہے تو تجھ پر کیوں نہ مٹ جائے

ترے ہوتے ہوئے آخر یہ دنیا رائیگاں کیوں ہو

اگر مسرور ہو دل سے تو کیوں بیزار ہو مجھ سے

اگر بیزار ہو مجھ سے تو دل میں مہماں کیوں ہو

یقیں کیا ہو گیا تم کو مرے دنیا سے جانے کا

نہیں تو یہ بتا دو آج اتنے مہرباں کیوں ہو

وہ ہستی جس کو کہیے عشق عکس حسن ذاتی ہے

نہیں جب درمیاں میکشؔ تو اس سے بد گماں کیوں ہو