اے دوست ہم پہ جب سے ترا التفات ہے

اے دوست ہم پہ جب سے ترا التفات ہے

ہر غم سے بے نیاز ہماری حیات ہے

کم کم ہے آسمان کے تاروں میں روشنی

شاید سحر قریب ہے تھوڑی سی رات ہے

ہے کس لئے اداس چمن کی کلی کلی

کیا بات ہے کہ زرد ہر اک پھول پات ہے

اظہار حال دل پہ بھلا کیوں خفا ہے تو

تیرا گلہ نہیں ہے زمانے کی بات ہے

اک تیرا غم ہی عشق کی تقدیر میں نہیں

ہمراہ تیرے غم کے غم کائنات ہے

کیوں دھوم سی مچے نہ مرے دل میں اے ظفرؔ

آئی شب فراق غموں کی برات ہے