آپ جب تک تھے نہ نزدیک دل و جاں اتنے

آپ جب تک تھے نہ نزدیک دل و جاں اتنے

ہم نہ رہتے تھے محبت میں پریشاں اتنے

یہ توقع تھی کسے شام الم سے پہلے

یہ مرے زخم جگر ہوں گے نمایاں اتنے

اس میں سازش تو رقیبوں کی یقیناً ہوگی

وہ نہ رہتے تھے کبھی ہم سے گریزاں اتنے

ان کو نسبت جو نہیں خانہ خرابی سے مری

کیوں حسیں لگنے لگے مجھ کو بیاباں اتنے

اوڑھے رہتے تھے ہمیشہ ہی ردائے تہذیب

موسم گل سے وہ پہلے تھے نہ عریاں اتنے

تجھ سے کیوں ہوتی بھلا کوئی شکایت ہم کو

ہم ترے غم میں اٹھائے جو نہ نقصاں اتنے

تیرگی غم کی نہیں دل میں کہیں بھی باقی

یاد جاناں کے ستارے ہیں درخشاں اتنے

اے ظفر اس کا گماں تک بھی نہیں تھا ہم کو

ہم گنہ گار وفا ہوں گے پشیماں اتنے