عمر رواں کا قافلہ کتنا سبک خرام ہے

عمر رواں کا قافلہ کتنا سبک خرام ہے

آ گئیں چند ہچکیاں اور سفر تمام ہے

عشق میں اپنا رات دن کام یہی مدام ہے

دل میں کسی کی یاد ہے لب پہ کسی کا نام ہے

ساقی نہیں سبو نہیں اور نہ کوئی جام ہے

اب یہ شراب واقعی میرے لئے حرام ہے

دنیا یہ جانتی ہے آپ پردہ نشین ہیں مگر

دل میں مرے رہیں حضور پردے کا انتظام ہے

اپنے پرائے دیکھ کر سب ہی تو کانپ کانپ اٹھے

میری شبِ فراق بھی کتنی سیاہ فام ہے

سوزِ غم فراق کا شکوہ ظہیرؔ سے عبث

عاشقی اور سکون دل یہ تو خیال خام ہے