کھچ کے واعظ بھی چلے آئے ہیں مے خانے میں

کھچ کے واعظ بھی چلے آئے ہیں مے خانے میں

ساقیا کون سی مے ہے ترے پیمانے میں

دل میں آکر کبھی ارمانوں کا غوغا تو سنو

ایک آبادی ہے پنہاں مرے ویرانے میں

ہر تماشہ میں وہ کرتا ہے تماشہ تیرا

ہوشیاری یہ بڑی ہے ترے دیوانے میں

مجھ سے دیوانے کو اے حضرت واعظ کہیے

فائدہ آپ نے کیا سمجھا ہے سمجھانے میں

عشق میں مر ہی کے ملتی ہے حیات جاوید

راز پنہاں ہے یہ پروانہ کے جل جانے میں

محمل دل کی طرف جھانک کے دیکھو تو ظہورؔ

حسن لیلیٰ کی ضیا ہے اسی کاشانے میں