غیر آباد مکان کے دروازے پر ایک شخص کا بھیرویں الاپنا۔ دفترششم

ایک شخص کسی حویلی کے دروازے پر بھیرویں گا رہاتھا حالانکہ کہ ابھی آدھی رات آئی تھی۔ اس سے ایک کہنے والے نے کہا کہ بھائی! توعجیب بے صبرا ہے۔ آدھی رات کو گلا چیرے جاتا ہے۔ یہ بھیرویں صبح ہوتے گائیو۔ دوسرے، ذرا یہ تو یکھ بھال لے کہ اس گھر میں کوئی ہے بھی یا نہیں، یہاں تو سوا بھوت پریت کے اور کوئی نہیں، تو اپنا وقت ناحق خراب کرتا ہے۔ تیرا گانا سمجھنے اور مزہ لینے کو صاحبِ ہوش چاہئے سو یہاں صاحبِ ہوش کہاں ہے۔ اس نے جواب دیا کہ غلام سے جواب سن لیجئے تاکہ آپ کو میری حرکت پر حیرت نہ رہے۔

اگر چہ اس وقت آپ کی حس آدھی رات محسوس کررہی ہے لیکن میرے نزدیک یہ وقت صبحِ صادق کا ہے اور ساری راتیں میری آنکھوں میں دن ہوگئی ہیں اور یہ جو آپ نے فرمایا کہ حویلی اور جلو خانے میں کوئی نہیں ہے طبل کیوں بجاتا ہے؟ اس کا جواب یہ ہے کہ جو شخص آگاہ ہے وہ دوست کے گھر کو دوست سے آباد رکھتا ہے اور بہت سے مکان بھرے پڑے ہیں لیکن انجام بیں نگاہوں کو خالی نظر آتے ہیں۔