ایک یہودی کا حضرت علی سے مکابرہ اور ان کا جواب۔

ایک دن ایک مدعی نے جو خدا کی عظمت سے آگاہ نہ تھا حضرت علی مرتضیٰ سے کہا کہ تم محل کے کوٹھے پر ہو اور خدا حفاظت کا ذمہ دار ہے۔ اس سے بھی واقف ہو۔ حضرت علی نے فرمایا کیوں نہیں۔ وہ ہماری ہست وبود کا بچپن سے جوانی تک حفیظ و مربی رہاہے۔ اس نے کہا اگر ایسا ہے تو اپنے کو کوٹھے سے گرا کر حفاظتِ حق پر اعتماد کرو، تاکہ مجھے تمہارے یقین کا اطمینان ہو اور تمہارے خدا پر بھی اعتقاد پید اہوجائے۔ حضرت علی نے اس سے کہا کہ چل چپ رہ کہیں تیری جان اس جرأت کا شکار نہ ہوجائے، بھلا بندے کی کیا مجال کہ اپنی بدبختی سے خدا کی آزمایش کرے۔

ارے احمق! یہ تو خدا ئی منصب ہے کہ وہ ہر سانس پر اپنے بندوں کی آزمایش کرے تاکہ ہمارا حال ہم پر ظاہر ہوجائے کہ ہم اپنے دل کی گہرائیوں میں اس کے عقیدے پر کس قدر مضبوط ہیں۔ جس نے آسمان کی چھت کھڑی کردی اس کا امتحان کرنا تو کیا جانے۔ تو پہلے اپنا امتحان کر اس کے بعد دوسرے کا۔ یاد رکھ جہاں تیرے دل میں خدا کے امتحان کی آرزو پیدا ہوئی کہ تیرے دین کی مسجد جھاڑ جھنکار سے بھر گئی۔