ایک عرب کا اپنے کتّے کی جانکنی پر واویلا مچانا مگر کھانے کو ایک نوالہ بھی نہ دینا۔ دفترپنجم۔ مثنوی شریف

ایک کتّے کی جان نکل رہی تھی اور ایک عرب کے پاس بیٹھا رو رہاتھا۔ آنکھوں سے لگاتار آنسو بہہ رہے تھے اور کہتا جاتا تھا کہ ارے مجھ پر تو قیامت آگئی۔ ہائے میں کیا کروں۔ ارے کون سا جتن کروں؟ ارے پیارے کتے تیرے بعد کیوں کر جیوں گا؟ایک فقیر ادھر سے گزرا۔ پوچھا یہ کیا واقعہ ہے ،تو کس لیے رورہا ہے ۔اس نے کہا کہ میرا یک کتا بڑا ہی وفادار تھا دیکھو وہ راستے میں پڑا دم توڑ رہا ہے۔ دن کو شکار کر کے لاتا اور رات بھر نگہبانی کرتاتھا۔ کتا کیا تھا وہ تو شیر تھا۔ بڑی روشن آنکھوں والا، چوروں کو بھگانے والا اور شکار پکڑنے والا۔ وہ تو ایسا تھا کہ شکار کے پیچھے تیر کی طرح جاتا تھا۔ اس میں بلا کی قناعت تھی۔

بالکل بے غرض تھا اور دشمن کو پاس پھٹکنے نہ دیتا تھا اور اس کے باوجود بہت باوفا نیک خصلت اور مہربان تھا۔ فقیر نے پوچھا کہ اس کو کیا بیماری ہے۔ کیا کوئی زخم ہوگیا ہے۔ عرب نے کہا کہ بھوک سے مرا جاتا ہے۔ فقیر نے کہا کہ بھائی اس مصیبت اور مرض الموت پر صبر کو۔ صبر کرنے والوں کو خدا اپنے فضل و کرم سے عوض دیتا ہے۔

اس کے بعد پوچھا کہ سردارآپ کی پیٹھ پر یہ بھری ہوئی جھولی کا ہے کی ہے؟۔ کہاکہ کل کے واسطے کچھ روٹیاں اور کھائی پکائی کا سامان ہے۔ اپنے ہاتھ پیر کی قوت قائم رکھنے کے لئے لیے جاتا ہوں۔ فقیر نے کہا کہ پھر تم روٹی سالن کتے کو کیوں نہیں دیتے؟ عرب نے کہا اس درجہ محبت و بخشش میں نہیں پالتا۔ روٹیاں تو بے پیسے ہاتھ نہیں آتیں البتہ آنسو بے کار ہیں سو ان کو بہا دتیاہوں۔ فقیر نے کہا ارے خاک پڑے تیرے سر پر! اُو ہوا بھری ہوئی مَشک، تیرے نزدیک روٹی کا ایک نوالہ آنسو سے بڑھ کر ہے۔آنسو تو وہ خون ہے جس کو غم نے پانی بنادیا۔ ارے بے ہودہ تیرے نزدیک خون خاک کے برابر بھی نہیں رہا۔