ایک چور کا دوسرے سنپیرے کا سانپ چرالینا۔ دفتردوم

ایک چور نے کسی سنپیرے کا سانپ چرالیا اور بے وقوفی سے مالِ موذی نصیب غازی سمجھا۔ سانپ زہریلا تھا۔ سنپیرا تو ڈسنے سے محفوظ رہا لیکن چور اسی سانپ سے ڈسا گیا۔ سنپیرے نے جب اسے دیکھا تو کہا کہ میری جان یہ دعا کرتی تھی کہ الٰہی ایسا کر کہ اپنے چور کو پکڑوں اور سانپ چھین لوں۔ خدا کا شکر ہے کہ و ہ دعا قبول نہیں ہوئی اور جو بات میری مرضی کے خلاف تھی وہی فائدہ مند نکلی۔

آدمی بہت سی ایسی دعائیں کرتا ہے جو اگر پوری ہوجائیں تو نقصان و ہلاکت واقع ہو لیکن خدا اپنے کرم سے ایسی دعا پر توجہ نہیں فرماتا۔ دعا کرنے والا خدا سے شکایت اور بدگمانی کرتا ہے حالانکہ اس کی دعا کا نامقبول ہونا ہی بہتر ہے۔ وہ نہیں سمجھتا کہ اس نے اپنے لئے آپ ہی مصیبت کی دعا کی تھی اور خدانے محض اپنے کرم سے اس کو قبول نہ کیا۔