یار میرا جدا نہیں مجھ سے

یار میرا جدا نہیں مجھ سے

دور میرا خدا نہیں مجھ سے

دل پہ میرے لکھا ہے الا اللہ

راز مولیٰ چھپا نہیں مجھ سے

بے خودی سے ہوا ہوں دیوانہ

دوستو کچھ گلا نہیں مجھ سے

تو نے کچھ چارہ درد الفت کا

اے مسیحا کہاں نہیں مجھ سے

یار سے ہو گئی جو شب خلوت

سر مخفی چھپا نہیں مجھ سے

روز میثاق تیرا ہمدم تھا

بے وفا کیوں ملا نہیں مجھ سے

عمر بھر رویا جس کے عشق میں میں

یار دم بھر ہنسا نہیں مجھ سے

زلف کے پیچ میں پھنسا ایسا

دور ہوتی بلا نہیں مجھ سے

سلسلے میں ابو تراب کے ہوں

دور کچھ مصطفیٰ نہیں مجھ سے

ہے چھپا کون شکل انسان میں

یار گروہ ملا نہیں مجھ سے

خواجۂ چشت عاشقؔ اپنے ہے ساتھ

وہ جدا کچھ ہوا نہیں مجھ سے