وصل ہے پر دل میں اب تک ذوق غم پیچیدہ ہے

وصل ہے پر دل میں اب تک ذوق غم پیچیدہ ہے

بلبلہ ہے عین دریا میں مگر نم دیدہ ہے

دل کی وہ وسعت کہ نقطے سے بھی کم سات آسماں

جسم یہ لاغر خط وہمی سے جو کاہیدہ ہے

دیجئے کس چیز سے تشبیہ تیرے حسن کو

ایک توہی دیدہ ہے تیرے سوا نادیدہ ہے

بے حجابی یہ کہ ہر صورت میں جلوہ آشکار

گھونگٹ اس پر وہ کہ صورت آج تک نادیدہ ہے

اتنے بت خانوں میں سجدے ایک کعبہ کے عوض

کفر تو اسلام سے بڑھ کر ترا گرویدہ ہے

دم بخود رہنے دو کیوں رسوا ہو مجھ کو چھیڑ کر

غیر دریا بلبلے میں اور کیا پوشیدہ ہے

آدمی کی سرکشی غفلت ہے اپنی اصل سے

ذوق سجدہ قطرۂ افتادہ میں پیچیدہ ہے

حشر میں منہ پھیر کر کہنا کسی کا ہائے ہائے

آسیؔ گستاخ کا ہر جرم نا بخشیدہ ہے