دل کی ہر ایک بات مان دل پہ کوئی جفا نہ کر

دل کی ہر ایک بات مان دل پہ کوئی جفا نہ کر

دل ہے گزر گہ حبیب اس کو کبھی خفا نہ کر

عشق کی آبرو نہ کھو حسن کی بے رخی نہ دیکھ

اپنی وفا پہ رکھ نظر ان کا کبھی گلا نہ کر

ساقی کی سمت کان رکھ زاہد خشک کی نہ سن

عشق کا احترام سیکھ عقل کی اقتدا نہ کر

ذوق نگاہ کو نہ کر مرہون جلوہ ہائے حسن

حسن کی جلوہ گاہ دیکھ جلووں پہ اکتفا نہ کر

جینے کی آرزو نہ کر مقصد زندگی سمجھ

عشرت خلد کے لیے مرنے کی التجا نہ کر

اعظمؔ خستہ خوگر رنج و الم ازل سے ہے

جس سے سکوں نصیب ہو ایسی کوئی دعا نہ کر