حاجت حرم کی ہے نہ صنم خانہ چاہیے

حاجت حرم کی ہے نہ صنم خانہ چاہیے

ذوق سجود کو در جانانہ چاہیے

دل میں نہیں ہے کوئی تمنا نہ آرزو

بس ایک تیر نرگس مستانہ چاہیے

صورت میں اس صنم کی خدا کو تو پا لیا

اب اور کیا تجھے دل دیوانہ چاہیے

اٹھی نگاہ ناز تو رندوں نے یہ کہا

اس چشم مست ناز کا پیمانہ چاہیے

جنت کی آرزو ہے نہ حوروں کی ہے طلب

ہر لمحہ سامنے روئے جانانہ چاہیے

بیکار ہے یہ زہد یہ تقویٰ کہ حسن کو

سب کچھ لٹا دے جو وہی دیوانہ چاہیے

کاوشؔ ازل سے میں ہوں فدائے ابو تراب

ان کے سوا کسی کا نہ یارانہ چاہیے