مجھے کل اپنی بخشش کا یقیں ہے

مجھے کل اپنی بخشش کا یقیں ہے

محبت ان کی دل میں جانشیں ہے

در احمد پہ اب میری جبیں ہے

مجھے کچھ فکر دو عالم نہیں ہے

میں ہوں اور یاد سرکار مدینہ

یہ دنیا دل کی کس درجہ حسیں ہے

بہاریں یوں تو جنت میں ہیں لاکھوں

فضائے دشت طیبہ پر نہیں ہے

میں وصف ماہ طیبہ کر رہا ہوں

بلا سے گر کوئی چیں بر جبیں ہے

عبث جاتا ہے تو غیروں کی جانب

کہ باب رحمت رحماں نہیں ہے

گنہ گارو نہ گھبراؤ کہ اپنی

شفاعت کو شفیع المذنبیں ہے

قریب نفس میں ہمدم نہ آنا

بچے رہنا یہ مار آستیں ہے

ذرا آہستہ چل او چلنے والے

کہ اس جا اخترؔ خستہ دفیں ہے