فنا کا جام اے ساقی میں پی پی لوں تو بھر بھر دے

فنا کا جام اے ساقی میں پی پی لوں تو بھر بھر دے

بقا کی مے سے آنکھیں مثل نرگس مست کر کر دے

نرالا ہے تو اے مولیٰ نرالی تیری شانیں ہیں

کسی کو خاک کی ڈھیری کسی کو سنگ مرمر دے

براق شاہ نے معراج میں یہ کی دعا حق سے

عطا کر وہ قدم آواز چلنے میں جو فرفر دے

الٰہی روضۂ خیر الوریٰ پر جلد جا پہنچوں

برنگ گردش گردوں یہ گردش مجھ کو صرصر دے

کہا جبرئیل سے حق نے دم میلاد پیغمبر

مرے محبوب کی آمد کا تو پیغام گھر گھر دے

صدا یہ آ رہی ہے دم بدم ہو کے بیاباں سے

اجل قبروں میں لاشیں مرنے والوں کی تو دھر دھر دے

جلالیؔ ہے عجب اس قدر قیوم کی قدرت

کسی کو تاج سلطانی کسی کو بھیک در در دے