jo teri fikr teri yaad mein KHarab nahin

jo terī fikr tirī yaad meñ ḳharāb nahīñ

vo zindagī to mohabbat meñ kāmyāb nahīñ

jamāl-e-husn pe parda nahīñ naqāb nahīñ

baa.eñ nizām bhī nazāra kāmyāb nahīñ

usūl-e-dīd tamāshā-e-be-hijāb nahīñ

jo aañkh dekh rahī hai vo kāmyāb nahīñ

har ek zarre se jalva-numā.iyāñ un kī

vo be-hijāb haiñ hālāñki be-hijāb nahīñ

sañbhal-sañbhal are dildāda-e-majāz na ban

pas naqāb hai jo vo sar-e-naqāb nahīñ

ye kā.ināt ye rañgīniyāñ ye mad-hoshī

tamām ḳhvāb kā 'ālam hai aur ḳhvāb nahīñ

sukūn-e-’ishq meñ tauhīn-e-’ishq hai nādāñ

vo zindagī hī nahīñ jis meñ iztirāb nahīñ

bas ab to sāmne aa jā ki maiñ ne maan liyā

azal se le kar abad tak tirā javāb nahīñ

ḳhayāl-e-yār se hai rabt-e-ḳhās ai 'amabar'

kHabar ho ke bhī duniyā mirī ḳharāb nahīñ

jamāl-e-yār ke jalvoñ ke sāmne 'amabar'

ye āftāb to zarra hai āftāb nahīñ

jo teri fikr teri yaad mein KHarab nahin

wo zindagi to mohabbat mein kaamyab nahin

jamal-e-husn pe parda nahin naqab nahin

baen nizam bhi nazara kaamyab nahin

usul-e-did tamasha-e-be-hijab nahin

jo aankh dekh rahi hai wo kaamyab nahin

har ek zarre se jalwa-numaiyan un ki

wo be-hijab hain haalanki be-hijab nahin

sanbhal-sanbhal are dildada-e-majaz na ban

pas naqab hai jo wo sar-e-naqab nahin

ye kainat ye ranginiyan ye mad-hoshi

tamam KHwab ka 'alam hai aur KHwab nahin

sukun-e-’ishq mein tauhin-e-’ishq hai nadan

wo zindagi hi nahin jis mein iztirab nahin

bas ab to samne aa ja ki main ne man liya

azal se le kar abad tak tera jawab nahin

KHayal-e-yar se hai rabt-e-KHas ai 'amabar'

kHabar ho ke bhi duniya meri KHarab nahin

jamal-e-yar ke jalwon ke samne 'amabar'

ye aaftab to zarra hai aaftab nahin