جو تیری فکر تری یاد میں خراب نہیں

جو تیری فکر تری یاد میں خراب نہیں

وہ زندگی تو محبت میں کامیاب نہیں

جمال حسن پہ پردہ نہیں نقاب نہیں

بائیں نظام بھی نظارہ کامیاب نہیں

اصول دید تماشائے بے حجاب نہیں

جو آنکھ دیکھ رہی ہے وہ کامیاب نہیں

ہر ایک ذرے سے جلوہ نمائیاں ان کی

وہ بے حجاب ہیں حالانکہ بے حجاب نہیں

سنبھل سنبھل ارے دلدادۂ مجاز نہ بن

پس نقاب ہے جو وہ سر نقاب نہیں

یہ کائنات یہ رنگینیاں یہ مدہوشی

تمام خواب کا عالم ہے اور خواب نہیں

سکون عشق میں توہین عشق ہے ناداں

وہ زندگی ہی نہیں جس میں اضطراب نہیں

بس اب تو سامنے آ جا کہ میں نے مان لیا

ازل سے لے کر ابد تک ترا جواب نہیں

خیال یار سے ہے ربط خاص اے عنبرؔ

خرب ہو کے بھی دنیا مری خراب نہیں

جمال یار کے جلووں کے سامنے عنبرؔ

یہ آفتاب تو ذرہ ہے آفتاب نہیں