کسی کی چاہ بھی دل میں مرے اے نازنیں نکلی

کسی کی چاہ بھی دل میں مرے اے نازنیں نکلی

ترے تیروں نے گھر کی تلاشی لی کہیں نکلی

تری صورت کچھ ایسی کلک قدرت سے حسیں نکلی

کہ اس کی ہر ادا سے شان صورت آفریں نکلی

الٰہی قتل پر میرے وہ اتراتے ہیں کیوں اتنا

بدن سے جان نکلی یا دہن سے آفریں نکلی

دل مجنوں سے نکلی آہ یا بجلی کوئی چمکی

کہ محمل سے تڑپ کر لیلی محمل نشیں نکلی

شریک حال عاشق بیکسی میں کون ہوتا ہے

جو نکلی بھی تو کچھ دل سوز آہ آتشیں نکلی

تن ہیجان کو زیر خاک کیا دھر دھر کے پیسا ہے

ستم کرنے میں استاد و آسماں کی بھی زمیں نکلی

نہ چھوڑا ساتھ ان کا میری تربت پر بھی آنے میں

بڑی پابند اپنی وضع کی چین جبیں نکلی

جنوں اب تک سنا تھا ساتھ چولی اور دامن کا

گریباں کو نکلتے دیکھ کر کیوں آستیں نکلی

غش آیا وصل میں مجھ کو تو بولی نازکی اس کی

کہ لو مجھ سے بھی ان کی ناتوانی نازنیں نکلی

امیرؔ ابھرا جو وہ جوبن ملا دل کا پتا مجھ کو

یہی دنوں اچکے چور تھے چوری یہیں نکلی