نازکی کہتی ہے تسمہ تو لگا رہنے دے

نازکی کہتی ہے تسمہ تو لگا رہنے دے

ناز کہتا ہے لگی میری بلا رہنے دے

بے پر و بال ہوں طاقت نہیں اڑنے کی صبا

اک ذرا شاخ نشیمن کو جھکا رہنے دے

اے نمک پاش خدا کے لئے چٹکی نہ رکے

ایک دم اور تڑپنے کا مزا رہنے دے

سو بلائیں ہیں ترے ہوش کی دشمن شب وصل

لے اڑیں اور ادائیں جو حیا رہنے دے

اے فلک گور غریباں کو تو برباد نہ کر

اس لئے قافلہ کا کچھ تو پتا رہنے دے

اک کھٹک سی ہے مرے کوہ میں درکار جنوں

کوئی کانٹا کسی چھاتی میں چبھا رہنے دے

سو چمن صدقے کئے دامن گلچیں پہ امیرؔ

ذکر پھولوں کا یہاں باد صبا رہنے دے